Mashhoor Pakistani adakara aur legendry funkarah Bushra Ansari ne haal hi mein aik interview ke dauraan social media stars par dilchasp tabsara kiya. Unka kehna tha, “Mujhy bilkul nahi pata ke log YouTubers aur TikTokers ko kahan dekhte hain.”
Bushra Ansari ne wazahat karte hue kaha ke wo zyada tar television aur riwayati media se judi rehti hain aur naye digital dunya ko itna follow nahi kartin. Unke mutabiq, purane zamane ke adakaron ne apni mehnat aur talent ke balboote par naam banaya, jabke aaj kal shohrat hasil karne ke tareeqe mukhtalif ho gaye hain.
Adakara ka yeh bayan social media par tezhi se viral ho raha hai, jahan fans aur internet users is par mila jula rad-e-amal de rahe hain. Kuch logon ne unke khayalat se ittefaq kiya, jabke doosron ka kehna hai ke digital media ke zariye bhi basalat afraad ubhar kar samne aa rahe hain.
Yeh yaad rahe ke Bushra Ansari Pakistan ki mashhoor adakara, gulukarah aur mezban hain, jo kai dahaiyon tak showbiz industry mein apni salahiyat ka loha manwati rahi hain.
